Општина Центар ги направи сите неопходни подготовки за почеток на новата учебна година во услови на пандемијата на Ковид-19, следејќи ги препораките на надлежните институции.
![](https://www.centar.gov.mk/wp-content/uploads/2020/09/Обуки-2.jpg)
Водејќи максимална грижа за децата со потешкотии во развојот во учењето, преземени се дополнителни мерки за приемот на децата во основните училишта и градинките.
Оваа година основните училишта ќе имаат на располагање 16 лични асистенти, кои ќе им бидат поддршка на овие ученици, особено во овој период на присуство на коронавирусот. За 5 асистенти, средствата ќе се обезбедат со донација од УНДП, а трошоците за останатите 11 ќе бидат покриени од буџетот на Општина Центар.
Покрај личните асистенти, основните училишта „Св. Кирил и Методиј“ и „Кочо Рацин“, во соработка со здружението „Отворете ги прозорците“, а со поддршка на Детската фондација „Песталоци“, ќе добијат асистивна технологија за работа со учениците со потешкотии во учењето, а обуките на кадарот за користењето на технологијата се во тек.
Општина Центар е во завршна фаза на подготовките за отпочнувањето со работа на трите сензорни соби, кои се наоѓаат во трите општински детски градинки.
![](https://www.centar.gov.mk/wp-content/uploads/2020/09/Обуки-1-1024x768.jpg)
За сензорните соби, кои ќе се користат за олеснување на престојот во градинките на децата со аутистички спектар, во моментов се одвиваат обуки на воспитувачкиот кадар и стручните соработници во градинките за правилно користење на сензорните соби и работа со децата.
Земајќи ја предвид моменталната состојба со пандемијата на коронавирусот, општинските воспитно-образовни институции водат и ќе водат целосна грижа сите деца да бидат вклучени во процесот, обезбедувајќи им безбеден и квалитетен престој во детските градинки и основните училишта.