Герасимовски: „Патувачкото кино“ донесе радост во Центар, вечерва нови проекции под отворено небо
Со многу детска љубопитност, дружење и убава атмосфера започна „Патувачкото кино“ на Општина Центар.
Паркот во Капиштец и просторот кај ООУ „Кочо Рацин“ вчера беа исполнети со деца и семејства кои уживаа во проекцијата на македонскиот детски филм „Мали промени – големи разлики“.
„Навистина ми е драго кога гледам дека нашите паркови стануваат места каде децата се дружат, се смеат и создаваат убави спомени, а воедно преку филмот учат за добро однесување и вистинските вредности. Успеавме на најмладите да им понудиме нова, квалитетна содржина што ќе ги поттикне да излезат од дома и да поминуваат време со другарите“, порача градоначалникот Горан Герасимовски.
„Патувачкото кино“ продолжува и во наредните денови низ центарските маала.
Вечерва проекциите ќе се одржат на две локации: во 20:00 часот на игралиштето на ООУ „Ј. Х. Песталоци“, а во 21:00 часот на „Плочник“ во Градски ѕид.
